Kusalaṁ dhammaṁ paṭicca kusalo dhammo uppajjati vippayuttapaccayā—kusalaṁ ekaṁ khandhaṁ paṭicca tayo khandhā, tayo khandhe paṭicca eko khandho, dve khandhe paṭicca dve khandhā; vatthuṁ vippayuttapaccayā. Kusalaṁ dhammaṁ paṭicca abyākato dhammo uppajjati vippayuttapaccayā—kusale khandhe paṭicca cittasamuṭṭhānaṁ rūpaṁ. Khandhe vippayuttapaccayā. Kusalaṁ dhammaṁ paṭicca kusalo ca abyākato ca dhammā uppajjanti vippayuttapaccayā—kusalaṁ ekaṁ khandhaṁ paṭicca tayo khandhā cittasamuṭṭhānañca rūpaṁ; tayo khandhe paṭicca eko khandho cittasamuṭṭhānañca rūpaṁ, dve khandhe paṭicca dve khandhā cittasamuṭṭhānañca rūpaṁ. Khandhā vatthuṁ vippayuttapaccayā. Cittasamuṭṭhānaṁ rūpaṁ khandhe vippayuttapaccayā. Akusalaṁ dhammaṁ paṭicca akusalo dhammo uppajjati vippayuttapaccayā—akusalaṁ ekaṁ khandhaṁ paṭicca tayo khandhā, tayo khandhe paṭicca eko khandho, dve khandhe paṭicca dve khandhā. Vatthuṁ vippayuttapaccayā. Akusalaṁ dhammaṁ paṭicca abyākato dhammo uppajjati vippayuttapaccayā—akusale khandhe paṭicca cittasamuṭṭhānaṁ rūpaṁ. Khandhe vippayuttapaccayā. Akusalaṁ dhammaṁ paṭicca akusalo ca abyākato ca dhammā uppajjanti vippayuttapaccayā—akusalaṁ ekaṁ khandhaṁ paṭicca tayo khandhā cittasamuṭṭhānañca rūpaṁ, tayo khandhe paṭicca eko khandho cittasamuṭṭhānañca rūpaṁ, dve khandhe paṭicca dve khandhā cittasamuṭṭhānañca rūpaṁ. Khandhā vatthuṁ vippayuttapaccayā. Cittasamuṭṭhānaṁ rūpaṁ khandhe vippayuttapaccayā.