Asaṅkiliṭṭhasaṅkilesiko dhammo saṅkiliṭṭhasaṅkilesikassa dhammassa adhipatipaccayena paccayo. <b>Ārammaṇādhipati</b>—dānaṁ datvā, sīlaṁ samādiyitvā, uposathakammaṁ katvā taṁ garuṁ katvā assādeti abhinandati, taṁ garuṁ katvā rāgo uppajjati, diṭṭhi uppajjati, pubbe suciṇṇāni garuṁ katvā assādeti abhinandati …pe… jhānā vuṭṭhahitvā jhānaṁ garuṁ katvā assādeti abhinandati …pe… cakkhuṁ garuṁ katvā assādeti abhinandati …pe… phoṭṭhabbe …pe… vatthuṁ asaṅkiliṭṭhasaṅkilesike khandhe garuṁ katvā assādeti abhinandati, taṁ garuṁ katvā rāgo uppajjati, diṭṭhi uppajjati. Asaṅkiliṭṭhaasaṅkilesiko dhammo asaṅkiliṭṭhaasaṅkilesikassa dhammassa adhipatipaccayena paccayo—ārammaṇādhipati, sahajātādhipati. <b>Ārammaṇādhipati</b>—nibbānaṁ maggassa, phalassa adhipatipaccayena paccayo. <b>Sahajātādhipati</b>—asaṅkiliṭṭhaasaṅkilesikādhipati sampayuttakānaṁ khandhānaṁ adhipatipaccayena paccayo. Asaṅkiliṭṭhaasaṅkilesiko dhammo asaṅkiliṭṭhasaṅkilesikassa dhammassa adhipatipaccayena paccayo—ārammaṇādhipati, sahajātādhipati. <b>Ārammaṇādhipati</b>—ariyā maggā vuṭṭhahitvā maggaṁ garuṁ katvā paccavekkhanti, phalaṁ garuṁ katvā paccavekkhanti, nibbānaṁ garuṁ katvā paccavekkhanti, nibbānaṁ gotrabhussa, vodānassa adhipatipaccayena paccayo. <b>Sahajātādhipati</b>—asaṅkiliṭṭhaasaṅkilesikādhipati cittasamuṭṭhānānaṁ rūpānaṁ adhipatipaccayena paccayo.