Anupādinnupādāniyo dhammo anupādinnupādāniyassa dhammassa āsevanapaccayena paccayo—purimā purimā anupādinnupādāniyā khandhā pacchimānaṁ pacchimānaṁ anupādinnupādāniyānaṁ khandhānaṁ āsevanapaccayena paccayo. Anulomaṁ gotrabhussa … anulomaṁ vodānassa āsevanapaccayena paccayo. Anupādinnupādāniyo dhammo anupādinnaanupādāniyassa dhammassa āsevanapaccayena paccayo—gotrabhu maggassa … vodānaṁ maggassa āsevanapaccayena paccayo. Kamma Upādinnupādāniyo dhammo upādinnupādāniyassa dhammassa kammapaccayena paccayo— upādinnupādāniyā cetanā sampayuttakānaṁ khandhānaṁ kammapaccayena paccayo; paṭisandhikkhaṇe upādinnupādāniyā cetanā sampayuttakānaṁ khandhānaṁ kaṭattā ca rūpānaṁ kammapaccayena paccayo. Cetanā vatthussa kammapaccayena paccayo. Upādinnupādāniyo dhammo anupādinnupādāniyassa dhammassa kammapaccayena paccayo—upādinnupādāniyā cetanā cittasamuṭṭhānānaṁ rūpānaṁ kammapaccayena paccayo. Upādinnupādāniyo dhammo upādinnupādāniyassa ca anupādinnupādāniyassa ca dhammassa kammapaccayena paccayo—upādinnupādāniyā cetanā sampayuttakānaṁ khandhānaṁ cittasamuṭṭhānānañca rūpānaṁ kammapaccayena paccayo. Anupādinnupādāniyo dhammo anupādinnupādāniyassa dhammassa kammapaccayena paccayo—anupādinnupādāniyā cetanā sampayuttakānaṁ khandhānaṁ cittasamuṭṭhānānañca rūpānaṁ kammapaccayena paccayo.