[๑๗๐] ๓ ยถาปิ เอกปุตฺตสฺมึ ปิยสฺมึ กุสลี สิยา
เอวํ สพฺเพสุ ปาเณสุ สพฺพตฺถ กุสโล สิยาติ ฯ
โสปาโก เถโร
[๑๗๑] ๔ อนาสนฺนวรา เอตา นิจฺจเมว วิชานตา
คามา อรญฺญมาคมฺม ตโต เคหํ อุปาวิสึ
ตโต อุฏฺฐาย ปกฺกามึ อนามนฺเตตฺวา โปสิโยติ ฯ
โปสิโย เถโร ฯ
[๑๗๒] ๕ สุขํ สุขตฺโถ ลภเต ตทาจรํ
กิตฺติญฺจ ปปฺโปติ ยสสฺส วฑฺฒติ
โย อริยมฏฺฐงฺคิกมญฺชสํ อุชุํ
ภาเวติ มคฺคํ อมตสฺส ปตฺติยาติ ฯ
สามญฺญกานิ เถโร ฯ
[๑๗๓] ๖ สาธุ สุตํ สาธุ จริตกํ
สาธุ สทา อนิเกตวิหาโร
อตฺถปุจฺฉนํ ปทกฺขิณกมฺมํ
เอตํ สามญฺญํ อกิญฺจนสฺสาติ ฯ
กุมาปุตฺโต เถโร ฯ
[๑๗๔] ๗ นานาชนปทํ ยนฺติ วิจรนฺตา อสญฺญตา
สมาธิญฺจ วิราเธนฺติ กึสุ รฏฺฐจริยา กริสฺสติ ฯ
ตสฺมา วิเนยฺย สารมฺภํ ฌาเยยฺย อปุรกฺขโตติ ฯ