ปญฺจงฺคิเก สมาธิมฺหิ สนฺเต เอโกทิภาวิเต

ปฏิปฺปสฺสทฺธิลทฺธมฺหิ ทิพฺพจกฺขุํ วิสุชฺฌิ เม ฯ

จุตูปปาตํ ชานามิ สตฺตานํ อาคตึ คตึ

อิตฺถภาวญฺญถาภาวํ ฌาเน ปญฺจงฺคิเก ฐิโต ฯ

ปริจิณฺโณ มยา สตฺถา ฯเปฯ ภวเนตฺติ สมูหตา ฯ

วชฺชีนํ เวฬุวคาเม อหํ ชีวิตสงฺขยา

เหฏฺฐโต เวฬุคุมฺพสฺมึ นิพฺพายิสฺสํ อนาสโวติ ฯ

อนุรุทฺโธ เถโร ฯ

[๓๙๔] ๑๐ สมณสฺส อหู จินฺตา ปุปฺผิตมฺหิ มหาวเน

เอกคฺคสฺส นิสินฺนสฺส ปวิวิตฺตสฺส ฌายิโน ฯ

อญฺญถา โลกนาถมฺหิ ติฏฺฐนฺเต ปุริสุตฺตเม

อิริยํ อาสิ ภิกฺขูนํ อญฺญถา ทานิ ทิสฺสเต ฯ

สีตวาตปริตฺตานํ หิริโกปีนฉาทนํ

มตฺตฏฺฐิยํ อภุญฺชึสุ สนฺตุฏฺฐา อิตรีตเร ฯ

ปณีตํ ยทิ วา ลูขํ อปฺปํ วา ยทิ วา พหุํ

ยาปนตฺถํ อภุญฺชึสุ อคิทฺธา นาธิมุจฺฉิตา ฯ

ชีวิตานํ ปริกฺขาเร เภสชฺเช อถ ปจฺจเย

น พาฬฺหํ อุสฺสุกา อาสุํ ยถา เต อาสวกฺขเย ฯ

อรญฺเญ รุกฺขมูเลสุ กนฺทราสุ คุหาสุ จ

วิเวกมนุพฺรูหนฺตา วิหึสุ ๑ ตปฺปรายนา ฯ #๑ โป. ม. วิหํสุ ฯ