ตํ กุโต อาคตํ ปุตฺตํ มม ปุตฺโตติ โรทสิ ฯ

มคฺคญฺจ โขสฺส ชานาสิ อาคตสฺส คตสฺส วา

น นํ สมนุโสเจสิ เอวํ ธมฺมา หิ ปาณิโน ฯ

อยาจิโต ตโตคจฺฉิ อนนุญฺญาโต ๑ อิโต คโต

กุโตปิ นูน อาคนฺตฺวา วสิตฺวา กติปาหกํ ฯ

อิโตปิ อญฺเญนาคโต ตโต อญฺเญน คจฺฉติ

เปโต มนุสฺสรูเปน สํสรนฺโต คมิสฺสติ

ยถาคโต ตถา คโต กา ตตฺถ ปริเทวนา ฯ

อพฺพุยฺหิ ๒ วต เม สลฺลํ ทุทฺทสํ หทยนิสฺสิตํ

ยา เม โสกปเรตาย ปุตฺตโสกํ พฺยปานุทิ ฯ

สาชฺช อพฺพูฬฺหสลฺลาหํ นิจฺฉาตา ปรินิพฺพุตา

พุทฺธํ ธมฺมญฺจ สงฺฆญฺจ อุเปมิ สรณํ มุนึ ฯ

ปญฺจสตา ปฏาจารา ฯ

[๔๕๒] ๒ ปุตฺตโสเกนหํ อฏฺฏา ขิตฺตจิตฺตา วิสญฺญินี

นคฺคา ปกิณฺณเกสี จ โรทํ ๓ เตน วิจาริหํ ฯ

วีถิสงฺการกูเฏสุ สุสาเน รถิยาสุ จ

อจรึ ตีณิ วสฺสานิ ขุปฺปิปาสาสมปฺปิตา ฯ

อถทฺทสามิ สุคตํ นครํ มิถิลํ คตํ

อทนฺตานํ ทเมตารํ สมฺพุทฺธํ อกุโตภยํ ฯ #๑ โป. ม. นานุญฺญาโต ฯ ๒ ยุ. อพฺพุหิ ฯ ๓ โป. ม. เตน ฯ