มุหุตฺตํ จิตฺตปสาทสฺส อิทฺธึ ปสฺส ยสญฺจ เม

อานุภาวญฺจ เม ปสฺส วณฺณํ ปสฺส ชุติญฺจ เม

เย จ เต ทีฆมทฺธานํ ธมฺมํ อสฺโสสุํ โคตม

ปตฺตา เต อจลฏฺฐานํ ยตฺถ คนฺตฺวา น โสจเรติ ฯ

มณฺฑุกเทวปุตฺตวิมานํ ปฐมํ ฯ

[๕๒] ๒ จิรปฺปวาสึ ปุริสํ ทูรโต โสตฺถิมาคตํ

ญาตี มิตฺตา สุหชฺชา จ อภินนฺทนฺติ อาคตํ

ตเถว กตปุญฺญํปิ อสฺมา โลกา ปรํ คตํ

ปุญฺญานิ ปฏิคฺคณฺหนฺติ ปิยํ ญาตีว อาคตํ

อุฏฺเฐหิ เรวเต สุปาปธมฺเม

อปารุตํ ทฺวารํ อทานสีเล

เนสฺสาม ตํ ยตฺถ ถุนนฺติ ทุคฺคตา

สมปฺปิตา เนรยิกา ทุกฺเขนาติ

อิจฺเจวํ วตฺวาน ยมสฺส ทูตา

เต เทฺว ยกฺขา โลหิตกฺขา พฺรหนฺตา

ปจฺเจกพาหาสุ คเหตฺวา เรวตึ

ปกฺกามยึสุ เทวคณสฺส สนฺติเก

อาทิจฺจวณฺณํ รุจิรํ ปภสฺสรํ

พฺยมฺหํ สุภํ กญฺจนชาลฉนฺนํ