ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ

เมตฺติกา ฯ

[๔๒๖] ๗ จาตุทฺทสี ปญฺจทสี ๑ ยา จ ปกฺขสฺส อฏฺฐมี

ปาฏิหาริกปกฺขญฺจ อฏฺฐงฺคสุสมาคตํ

อุโปสถํ อุปคจฺฉึ เทวกายาภินนฺทินี ฯ

สาชฺช เอเกน ภตฺเตน มุณฺฑา สงฺฆาฏิปารุตา

เทวกายํ น ปตฺเถหํ วิเนยฺย หทเย ทรํ ฯ

มิตฺตา ฯ

[๔๒๗] ๘ อุทฺธํ ปาทตลา อมฺม อโธ เจ ๒ เกสมตฺถกา

ปจฺจเวกฺขสฺสุมํ กายํ อสุจึ ปูติคนฺธิกํ ฯ

เอวํ วิหรมานาย สพฺโพ ราโค สมูหโต

ปริฬาโห สมุจฺฉินฺโน สีติภูตมฺหิ นิพฺพุตา ฯ

อภยมาตา ฯ

[๔๒๘] ๙ อภเย ภิทุโร กาโย ยตฺถ สตฺตา ปุถุชฺชนา

นิกฺขิปิสฺสามิมํ เทหํ สมฺปชานา ปฏีสตา ๓ ฯ

พหูหิ ทุกฺขธมฺเมหิ อปฺปมาทรตาย เม

ตณฺหกฺขโย อนุปฺปตฺโต กตํ พุทฺธสฺส สาสนํ ฯ

อภยตฺเถรี ฯ

#๑ ม. จาตุทฺทสึ ปญฺจทสึ ฯ ๒ โป. ม. อโธ เว ฯ ๓ ม. ยุ. สตีมตี ฯ