พหูวตสมาทานา อฑฺฒํ สีสสฺส โอลิขึ

ฉมาย เสยฺยํ กปฺเปมิ รตฺติภตฺตํ น ภุญฺชิหํ ฯ

วิภูสมณฺฑนรตา นฺหาปนจฺฉาทเนหิ จ

อุปกาสึ อิมํ กายํ กามราเคน อทฺธิตา ๑ ฯพ

ตโต สทฺธํ ลภิตฺวาน ปพฺพชึ อนคาริยํ

ทิสฺวา กายํ ยถาภูตํ กามราโค สมูหโต ฯ

สพฺเพ ภวา สมุจฺฉินฺนา อิจฺฉา จ ปตฺถนา ปิ จ

สพฺพโยควิสํยุตฺตา สนฺตึ ปาปุณึ เจตโส ฯ

นนฺทุตฺตรา เถรี ฯ

[๔๔๔] ๖ สทฺธาย ปพฺพชิตฺวาน อคารสฺมา อนคาริยํ

วิจริหํ เตน เตน ลาภสกฺการอุสฺสุกา ฯ

ริญฺจิตฺวา ปรมํ อตฺถํ หีนมตฺถํ อเสวิหํ

กิเลสานํ วสํ คนฺตฺวา สามญฺญตฺถํ นิรชฺชิหํ ๒ ฯ

ตสฺสา เม อหุ สํเวโค นิสินฺนาย วิหารเก

อุมฺมคฺคปฏิปนฺนมฺหิ ตณฺหาย วสมาคตา ฯ

อปฺปกํ ชีวิตํ มยฺหํ ชรา พฺยาธิ จ มทฺทติ

ปุรายํ ภิชฺชติ กาโย น เม กาโล ปมชฺชิตุํ ฯ

ยถาภูตมเวกฺขนฺตี ขนฺธานํ อุทยพฺพยํ

วิมุตฺตจิตฺตา อุฏฺฐาสึ กตํ พุทฺธสฺส สาสนํ ฯ

มิตฺตกาลี ๓ ฯ

#๑ ม. อฏฺฏิตา ฯ ยุ. อทฺทิตา ฯ ๒ ม. น พุชฺฌิหํ ฯ ๓ ม. มิตฺตากาฬี ฯ