น จตฺตวณฺณํ ปริสาสุ พฺยาหเร
อนุทฺธโต สมฺมิตภาณิ สุพฺพโต ฯ
สุสุขุมนิปุณตฺถทสฺสินา มติกุสเลน นิวาตวุตฺตินา
สํเสวิตพุทฺธสีลินา นิพฺพานํ น หิ เตน ทุลฺลภนฺติ ฯ
วิสาโข ปญฺจาลีปุตฺโต เถโร ฯ
[๓๐๓] ๖ นทนฺติ โมรา สุสิขา สุเปขุณา
สุนีลคีวา สุมุขา สุคชฺชิโน
สุสทฺทลา จาปิ มหามหี อยํ
สุพฺยาปิตมฺพุ สุวลาหกํ นภํ ฯ
สุกลฺลรูโป สุมนสฺส ฌายิตํ
สุนิกฺกโม ๑ สาธุ สุพุทฺธสาสเน
สุสุกฺกสุกฺกํ นิปุณํ สุทุทฺทสํ
ผุสาหิ ตํ อุตฺตมมจฺจุตํ ปทนฺติ ฯ
จูฬโก เถโร ฯ
[๓๐๔] ๗ นนฺทมานาคตํ จิตฺตํ สูลมาโถปมานกํ
เตน เตเนว วชสิ เยน สูลํ กลิงฺครํ ฯ
ตาหํ จิตฺต กลึ พฺรูมิ ตํ พฺรูมิ จิตฺตทุพฺภกํ
สตฺถา เต ทุลฺลโภ ลทฺโธ มานตฺเถ มํ นิโยชยีติ ฯ
อนูปโม เถโร ฯ
#๑ ยุ. สุนิกฺขโม ฯ