ขณาตีตา หิ โสจนฺติ นิรยมฺหิ สมปฺปิตา ฯ

อุปสนฺโต อุปรโต มนฺตภาณี อนุทฺธโต

ธุนาติ ปาปเก ธมฺเม ทุมปตฺตํว มาลุโต ฯ

อุปสนฺโต อุปรโต มนฺตภาณี อนุทฺธโต

อพฺพหิ ๑ ปาปเก ธมฺเม ทุมปตฺตํว มาลุโต ฯ

อุปสนฺโต อนายาโส วิปฺปสนฺนมนาวิโล ๒

กลฺยาณสีโล เมธาวี ทุกฺขสฺสนฺตกโร สิยา ฯ

น วิสฺสเส เอกติเยสุ เอวํ

อคาริสุ ปพฺพชิเตสุ จาปิ

สาธูปิ หุตฺวาน อสาธุ โหนฺติ

อสาธุ หุตฺวา ปุน สาธุ โหนฺติ ฯ

กามจฺฉนฺโท จ พฺยาปาโท ถีนมิทฺธญฺจ ภิกฺขุโน

อุทฺธจฺจํ วิจิกิจฺฉา จ ปญฺจ เต จิตฺตเกลิสา ฯ

ยสฺส สกฺกริยมานสฺส อสกฺกาเรน จูภยํ

สมาธิ น วิกมฺปติ อปฺปมาทวิหาริโน ฯ

ตํ ฌายินํ สาตติกํ สุขุมทิฏฺฐิวิปสฺสกํ

อุปาทานกฺขยารามํ อาหุ สปฺปุริโส อิติ ฯ

มหาสมุทฺโท ปฐวี ปพฺพโต อนิโลปิ จ

อุปมาย น ยุญฺชนฺติ ๓ สตฺถุ วรวิมุตฺติยา ฯ #๑ ม. อปฺปาสิ ฯ ๒ ม. วิปฺปสนฺโน อนาวิโล ฯ ๓ ม. ยุ. ยุชฺชนฺติ ฯ