ทารุํ นมยนฺติ ตจฺฉกา อตฺตานํ ทมยนฺติ สุพฺพตาติ ฯ
กุโฬ เถโร ฯ
[๑๕๗] ๑๐ มรเณ เม ภยํ นตฺถิ นิกนฺติ นตฺถิ ชีวิเต
สนฺเทหํ นิกฺขิปิสฺสามิ สมฺปชาโน ปติสฺสโตติ ฯ
อชิโต เถโร ฯ
อุทฺทานํ
จูฬวจฺโฉ มหาวจฺโฉ วนวจฺโฉ จ สีวโก
กุณฺฑธาโน จ เพลฏฺฐิ ทาสโก จ ตโต ปรํ
สิงฺคาลปิติโก เถโร กุโฬ จ อชิโต ทสาติ ฯ
วคฺโค ทุติโย ฯ
______________________
เถรคาถาย เอกนิปาตสฺส ตติยวคฺโค
[๑๕๘] ๑ นาหํ ภยสฺส ภายามิ สตฺถา โน อมตสฺส โกวิโท
ยตฺถ ภยํ นาวติฏฺฐติ เตน มคฺเคน วชนฺติ ภิกฺขโวติ ฯ
นิโคฺรโธ เถโร ฯ
[๑๕๙] ๒ นีลา สุคีวา สิขิโน โมรา การวิยํ ๑ อภินทนฺติ
เต สีตวาตกลิตา ๒ สุตฺตํ ฌานํ ๓ นิโพเธนฺตีติ
จิตฺตโก เถโร ฯ
#๑ ยุ. การํวิยํ ฯ ม. การมฺภิยํ ฯ ๒ ม. สีตวาตกีลิตา ฯ ๓ ม. ยุ. ฌายํ ฯ