[๔๒๙] ๑๐ จตุกฺขตฺตุํ ปญฺจกฺขตฺตุํ วิหารา อุปนิกฺขมึ

อลทฺธา เจตโส สนฺตึ จิตฺเต อวสวตฺตินี ฯ

ตสฺสา เม อฏฺฐมี รตฺติ ยโต ตณฺหา สมูหตา

พหูหิ ทุกฺขธมฺเมหิ อปฺปมาทรตาย เม

ตณฺหกฺขโย อนุปฺปตฺโต กตํ พุทฺธสฺส สาสนํ ฯ

สามา ฯ

ทุกนิปาโต สมตฺโต ฯ

_________________

เถรีคาถาย ติกนิปาโต

[๔๓๐] ๑ ปณฺณวีสติ วสฺสานิ ยโต ปพฺพชิตาย เม

นาภิชานามิ จิตฺตสฺส สมํ ลทฺธํ กุทาจนํ ฯ

อลทฺธา เจตโส สนฺตึ จิตฺเต อวสวตฺตินี

ตโต สํเวคมาปาทึ สริตฺวา ชินสาสนํ ฯ

พหูหิ ทุกฺขธมฺเมหิ อปฺปมาทรตาย เม

ตณฺหกฺขโย อนุปฺปตฺโต กตํ พุทฺธสฺส สาสนํ

อชฺช เม สตฺตมี รตฺติ ยโต ตณฺหา วิโสสิตา ฯ

อญฺญตรา สามา ฯ