Sukhāya vedanāya sampayuttaṁ dhammaṁ sahajāto …pe…. 1.3.3. Paccayavāra Sukhāya vedanāya sampayuttaṁ dhammaṁ paccayā …pe…. 1.3.4. Nissayavāra Sukhāya vedanāya sampayuttaṁ dhammaṁ nissāya …pe…. 1.3.5. Saṁsaṭṭhavāra Sukhāya vedanāya sampayuttaṁ dhammaṁ saṁsaṭṭho …pe…. 1.3.6. Sampayuttavāra Sukhāya vedanāya sampayuttaṁ dhammaṁ sampayutto sukhāya vedanāya sampayutto dhammo uppajjati hetupaccayā—sukhāya vedanāya sampayuttaṁ ekaṁ khandhaṁ sampayuttā dve khandhā, dve khandhe sampayutto eko khandho. (Saṅkhittaṁ.) Sampayuttavāro. 1.3.7. Pañhāvāra 1.3.7.1. Paccayānuloma Vibhaṅgavāra Hetu Sukhāya vedanāya sampayutto dhammo sukhāya vedanāya sampayuttassa dhammassa hetupaccayena paccayo—sukhāya vedanāya sampayuttā hetū sampayuttakānaṁ khandhānaṁ hetupaccayena paccayo; paṭisandhikkhaṇe sukhāya vedanāya sampayuttā hetū sampayuttakānaṁ khandhānaṁ hetupaccayena paccayo. Dukkhāya vedanāya sampayutto dhammo dukkhāya vedanāya sampayuttassa dhammassa hetupaccayena paccayo—dukkhāya vedanāya sampayuttā hetū sampayuttakānaṁ khandhānaṁ hetupaccayena paccayo.