Kusalaṁ dhammaṁ paccayā kusalo dhammo uppajjati hetupaccayā—kusalaṁ ekaṁ khandhaṁ paccayā tayo khandhā, tayo khandhe paccayā eko khandho, dve khandhe paccayā dve khandhā. Kusalaṁ dhammaṁ paccayā abyākato dhammo uppajjati hetupaccayā—kusale khandhe paccayā cittasamuṭṭhānaṁ rūpaṁ. Kusalaṁ dhammaṁ paccayā kusalo ca abyākato ca dhammā uppajjanti hetupaccayā—kusalaṁ ekaṁ khandhaṁ paccayā tayo khandhā cittasamuṭṭhānañca rūpaṁ, tayo khandhe paccayā eko khandho cittasamuṭṭhānañca rūpaṁ, dve khandhe paccayā dve khandhā cittasamuṭṭhānañca rūpaṁ. Akusalaṁ dhammaṁ paccayā akusalo dhammo uppajjati hetupaccayā—akusalaṁ ekaṁ khandhaṁ paccayā tayo khandhā, tayo khandhe paccayā eko khandho, dve khandhe paccayā dve khandhā. Akusalaṁ dhammaṁ paccayā abyākato dhammo uppajjati hetupaccayā—akusale khandhe paccayā cittasamuṭṭhānaṁ rūpaṁ. Akusalaṁ dhammaṁ paccayā akusalo ca abyākato ca dhammā uppajjanti hetupaccayā—akusalaṁ ekaṁ khandhaṁ paccayā tayo khandhā cittasamuṭṭhānañca rūpaṁ, tayo khandhe paccayā eko khandho cittasamuṭṭhānañca rūpaṁ, dve khandhe paccayā dve khandhā cittasamuṭṭhānañca rūpaṁ.