โส เทวปุตฺโต อตฺตมโน โมคฺคลฺลาเนน ปุจฺฉิโต

... เป ... ยสฺส กมฺมสฺสิทํ ผลํ

อหํ มนุสฺเสสุ มนุสฺสภูโต

ปุริมาย ชาติยา มนุสฺสโลเก

อทฺทสํ วิรชํ ภิกฺขุํ วิปฺปสนฺนมนาวิลํ

ตสฺส อทาสิหํ สูจึ ปสนฺโน สเกหิ ปาณิหิ

เตน เมตาทิโส วณฺโณ ... เป ...

วณฺโณ จ เม สพฺพทิสา ปภาสตีติ ฯ (๕)

ทุติยสูจิวิมานํ นวมํ ฯ8

[๖๐] ๑๐ สุสุกฺกขนฺธํ อภิรุยฺห นาคํ

อกาจินํ ทนฺติพลึ มหาชวํ

อารุยฺห คชํ ปวรํ สุกปฺปิตํ

อิธาคมา เวหาสยมนฺตลิกฺเข

นาคสฺส ทนฺเตสุ ทุเวสุ นิมฺมิตา

อจฺโฉทกา ปทุมินิโย สุผุลฺลา

ปทุเมสุ จ ตุริยคณา ปวชฺชเร

อิมา จ นจฺจนฺติ มโนหราโย

เทวิทฺธิปตฺโตสิ มหานุภาโว

มนุสฺสภูโต กิมกาสิ ปุญฺญํ

เกนาสิ เอวญฺชลิตานุภาโว