โส เทวปุตฺโต อตฺตมโน โมคฺคลฺลาเนน ปุจฺฉิโต
... เป ... ยสฺส กมฺมสฺสิทํ ผลํ้
อหํ มนุสฺเสสุ มนุสฺสภูโต
วิวเน ปเถ จงฺกมํ อกาสึ
อารามรุกฺขานิ จ โรปยิสฺสํ
ปิยา จ เม สีลวนฺโต อเหสุํ
อนฺนญฺจ ปานญฺจ ปสนฺนจิตฺโต
สกฺกจฺจ ทานํ วิปุลํ อทาสึ
เตน เมตาทิโส วณฺโณ ... เป ...
วณฺโณ จ เม สพฺพทิสา ปภาสตีติ ฯ
มณิถูณวิมานํ ตติยํ ฯ
[๗๘] ๔ โสวณฺณมเย ปพฺพตสฺมึ วิมานํ สพฺพโต ปภํ
เหมชาลปฏิจฺฉนฺนํ กึกณิกชาลกปฺปิตํ
อฏฺฐํสา สุกตา ถมฺภา สพฺเพ เวฬุริยามยา
เอกเมกาย อํสิยา รตนา สตฺต นิมฺมิตา
เวฬุริยสุวณฺณสฺส ผลิการูปิยสฺส จ
มสารคลฺลมุตฺตาหิ โลหิตงฺคมณีหิ จ
จิตฺรา มโนรมา ภูมิ น ตตฺถุทฺธํสเต รโช
โคปาณเส ๑ คณาปีตา กูฏํ ธาเรนฺติ นิมฺมิตา
โสปาณานิ จ จตฺตาริ นิมฺมิตา จตุโร ทิสา #๑ โป. ม. ยุ. โคปาณสี ฯ