กูฏาคารา สตฺตสตา อุฬารา
เวฬุริยตฺถมฺภา รุจิรตฺถตา สุภา
ตตฺถจฺฉสิ ปิวสิ ขาทสิ จ
ทิพฺพา จ วีณา ปวทนฺติ วคฺคู
ทิพฺพา รสา กามคุเณตฺถ ปญฺจ
นาริโย จ นจฺจนฺติ สุวณฺณฉนฺนา
เกน เตตาทิโส วณฺโณ ... เป ...
วณฺโณ จ เต สพฺพทิสา ปภาสตีติ ฯ
โส เทวปุตฺโต อตฺตมโน โมคฺคลฺลาเนน ปุจฺฉิโต
... เป ... ยสฺส กมฺมสฺสิทํ ผลํ
คิมฺหานํ ปจฺฉิเม มาเส ปตาปนฺเต ทิวงฺกเร
ปเรสํ ภตโก โปโส อมฺพารามํ อสิญฺจหํ
อถ เตนาคมา ภิกฺขุ สารีปุตฺโตติ วิสฺสุโต
กิลนฺตรูโป กาเยน อกิลนฺโตปิ เจตสา
ตญฺจ ทิสฺวาน อายนฺตํ อโวจ อมฺพสิญฺจโก
สาธุ ตํ ภนฺเต นฺหาเปยฺยํ ยํ มมสฺส สุขาวหํ
ตสฺส เม อนุกมฺปาย นิกฺขิปิ ปตฺตจีวรํ
นิสีทิ รุกฺขมูลสฺมึ ฉายาย เอกจีวโร
ตญฺจ อจฺเฉน วารินา ปสนฺนมานโส เถรํ
นฺหาปยึ รุกฺขมูลสฺมึ ฉายาย เอกจีวรํ