ภิกฺขุโน จรมานสฺส โทณินิมฺมุชฺชนี ๑ อหํ
อทาสึ อุชุภูตสฺส วิปฺปสนฺเนน เจตสา
ตสฺส กมฺมสฺส กุสลสฺส วิปากํ ทีฆมนฺตรํ
อนุโภมิ วิมานสฺมึ ตญฺจ ทานิ ปริตฺตกํ ฯ
อุทฺธํ จตูหิ มาเสหิ กาลกิริยา ภวิสฺสติ
เอกนฺตํ กฏุกํ โฆรํ นิรยูปปติสฺสหํ ๒
จตุกฺกณฺณํ จตุทฺวารํ วิภตฺตํ ภาคโส มิตํ
อโยปาการปริยนฺตํ อยสา ปฏิกุชฺชิตํ ฯ
ตสฺส อโยมยา ภูมิ ชลิตา เตชสา ยุตฺตา
สมนฺตา โยชนสตํ ผริตฺวา ติฏฺฐติ สพฺพทา
ตตฺถาหํ ทีฆมทฺธานํ ทุกฺขํ เวทิสฺสํ ๓ เวทนํ_
ผลญฺจ ปาปกมฺมสฺส ตสฺมา โสจามิทํ ๔ ภูตนฺติ ฯ
ขลาติยเปตวตฺถุ ๕ ทสมํ ฯ
[๙๖] ๑๑ ปุรโต จ ๖ เสเตน ปเลติ หตฺถินา
มชฺเฌ ปน อสฺสตรีรเถน
ปจฺฉา จ กญฺญา สิวิกายํ นิยฺยาติ
โอภาสยนฺตี ทส สพฺพโต ทิสา ฯ
ตุเมฺห ปน มุคฺครหตฺถปาณิโน
รุทมฺมุขา ภินฺนปภินฺนคตฺตา
#๑ ม. โทณินิมฺมชฺชนึ ฯ ยุ. โทณินิมฺมิญฺชนํ ฯ ๒ ม. นิรยํ ปปติสฺสหํ ฯ #๓ ม. เวทิสฺส ฯ ๔ ม. โสจามหํ ภุสนฺติ ฯ ๕ ม. ขลฺลาฏิยเปติวตฺกุ ฯ #๖ ม. ยุ. ว ฯ