ขุทาย ตณฺหาย จ ขชฺชมานา

ปาปสฺส กมฺมสฺส ผลํ มเมทํ ฯ

วนฺทามิ ตํ อยฺย ปสนฺนจิตฺตา

อนุกมฺป มํ วีร มหานุภาว

ทตฺวา จ เม อาทิส ยาหิ ๑ กิญฺจิ

โมเจหิ มํ ทุคฺคติยา ภทนฺเตติ ฯ

สาธูติ โส ตสฺสา ๒ ปฏิสุณิตฺวา สารีปุตฺโต อนุกมฺปโก

ภิกฺขูนํ อาโลปํ ทตฺวา ปาณิมตฺตญฺจ โจลกํ

ถาลกสฺส จ ปานียํ ตสฺสา ทกฺขิณมาทิสิ

สมนนฺตรา อนุทิฏฺเฐ วิปาโก อุปปชฺชถ ฯ

โภชนจฺฉาทนปานียํ ทกฺขิณาย อิทํ ผลํ

ตโต สุทฺธา สุจิวสนา กาสิกุตฺตมธารินี

วิจิตฺตวตฺถาภรณา สารีปุตฺตํ อุปสงฺกมิ ฯ

อภิกฺกนฺเตน วณฺเณน ยา ตฺวํ ติฏฺฐสิ เทวเต

โอภาเสนฺตี ทิสา สพฺพา โอสธี วิย ตารกา ฯ

เกน เตตาทิโส วณฺโณ เกน เต อิธมิชฺฌติ

อุปฺปชฺชนฺติ จ เต โภคา เย เกจิ มนโส ปิยา

ปุจฺฉามิ ตํ เทวิ มหานุภาเว

มนุสฺสภูตา กิมกาสิ ปุญฺญํ

เกนาปิ ๓ เอวํ ชลิตานุภาวา

#๑ ม. ยํ หิ ฯ ๒ ม. อยํ ปาโฐ นตฺถิ ฯ ๓ ม. เกนาสิ ฯ เอวมุปริปิ ฯ