[๙๙] ๒ นคฺคา ทุพฺพณฺณรูปาสิ กีสา ธมนิสณฺฐิตา

อุปฺผาสุฬิเก กีสิเก กา นุ ตฺวํ อิธ ติฏฺฐสีติ ฯ

อหนฺเต สกิยา มาตา ปุพฺเพ อญฺญาสุ ชาตีสุ

อุปฺปนฺนา ปิตฺติวิสยํ ขุปฺปิปาสา สมปฺปิตา

ฉฑฺฑิตํ ขิปิตํ เขฬํ สิงฺฆาณิกํ สิเลสุมํ

วสญฺจ ฑยฺหมานานํ วิชาตานญฺจ โลหิตํ

วณิตานญฺจ ๑ ยํ ฆานํ สีสจฺฉินฺนญฺจ ๒ โลหิตํ

ขุทาปเรตา ภุญฺชามิ อิตฺถีปุริสนิสฺสิตํ

ปุพฺพโลหิตํ ภกฺขามิ ๓ ปสูนํ มนุสฺสานญฺจ

อเลณา จ อนคารา จ นีลมญฺจปรายนา

เทหิ ปุตฺตก เม ทานํ ทตฺวา อุทฺทิสาหิ ๔ เม

อปฺเปว นาม มุญฺเจยฺยํ ปุพฺพโลหิตโภชนาติ ฯ

มาตุยา วจนํ สุตฺวา อุปติสฺโสนุกมฺปโก

อามนฺตยิ โมคฺคลฺลานํ อนุรุทฺธญฺจ กปฺปินํ

จตสฺโส กุฏิโย กตฺวา สงฺเฆ จตุทฺทิเส อทา

กุฏิโย อนฺนปานญฺจ มาตุ ทกฺขิณมาทิสิ ฯ

สมนนฺตรานุทิฏฺเฐ วิปาโก อุปปชฺชถ

โภชนํ ปานียํ วตฺถํ ทกฺขิณาย อิทํ ผลํ

ตโต สุทฺธา สุจิวสนา กาสิกุตฺตมธารินี

วิจิตฺตวตฺถาภรณา โกลิตํ อุปสงฺกมิ ฯ #๑ ม. วณิกานญฺจ ฯ ๒ ม. ฆาน-สีสจฺฉินฺนาน โลหิตํ ฯ ๓ สี. --โลหิตภกฺขาสฺมิ ฯ #๔ ม. อนฺวาทิสาหิ เม ฯ