อหํ มนุสฺเสสุ มนุสฺสภูตา
สุณิสา อโหสึ สสุรสฺส ฆเร
อทฺทสํ วิรชํ ภิกฺขุํ วิปฺปสนฺนมนาวิลํ
ตสฺส อทาสิหํ ภาคํ ปสนฺนา สเกหิ ปาณิหิ
กุมฺมาสปิณฺฑํ ทตฺวาน โมทามิ นนฺทเน วเน
เตน เมตาทิโส วณฺโณ เตน เม อิธมิชฺฌติ
อุปฺปชฺชนฺติ จ เม โภคา เย เกจิ มนโส ปิยา
เตนมฺหิ เอวญฺชลิตานุภาวา
วณฺโณ จ เม สพฺพทิสา ปภาสตีติ ฯ
สุณิสาวิมานํ จุทฺทสมํ ฯ
[๑๕] อภิกฺกนฺเตน วณฺเณน ยา ตฺวํ ติฏฺฐสิ เทวเต
โอภาเสนฺตี ทิสา สพฺพา โอสธี วิย ตารกา
เกน เตตาทิโส วณฺโณ เกน เต อิธมิชฺฌติ
อุปฺปชฺชนฺติ จ เต โภคา เย เกจิ มนโส ปิยา
ปุจฺฉามิ ตํ เทวิ มหานุภาเว
มนุสฺสภูตา กิมกาสิ ปุญฺญํ
เกนาสิ เอวญฺชลิตานุภาวา
วณฺโณ จ เต สพฺพทิสา ปภาสตีติ ฯ
สา เทวตา อตฺตมนา โมคฺคลฺลาเนน ปุจฺฉิตา
ปญฺหํ ปุฏฺฐา วิยากาสิ ยสฺส กมฺมสฺสิทํ ผลํ