วณฺโณ จ เม สพฺพทิสา ปภาสตีติ ฯ

มม จ ภนฺเต วจเนน ภควโต ปาเท สิรสา วนฺเทยฺยาสิ อุตฺตรา นาม ภนฺเต อุปาสิกา ภควโต ปาเท สิรสา วนฺทตีติ อนจฺฉริยํ โข ปเนตํ ภนฺเต ยํ มํ ภควา อญฺญตรสฺมึ สามญฺญผเล พฺยากเรยฺย ตํ ภควา สกทาคามิผเล พฺยากาสีติ ฯ

อุตฺตราวิมานํ ปณฺณรสมํ ฯ

[๑๖] ยุตฺตา จ เต ปรมอลงฺกตา หยา

อโธมุขา อฆสิ คมา พลี ชวา

อภินิมฺมิตา ปญฺจ รถา สตา จ เต

อเนฺวนฺติ ตํ สารถิโจทิตา หยา

สา ติฏฺฐสิ รถวเร อลงฺกตา

โอภาสยํ ชลมิว โชติปาวโก

ปุจฺฉามิ ตํ วรตนุ อโนมทสฺสเน

กสฺมา กายา อนธิวรํ อุปาคมิ

กามคฺคปตฺตานํ ยมาหุ อนุตฺตรา

นิมฺมาย นิมฺมาย รมนฺติ เทวตา

ตสฺมา กายา อจฺฉรา กามวณฺณินี

อิธาคตา อนธิวรํ นมสฺสิตุํ

กึ ตฺวํ ปุเร สุจริตมาจรี อิธ