[๒๑๙] ๒ เยน เยน สุภิกฺขานิ สิวานิ อภยานิ จ
เตน ปุตฺตก คจฺฉสฺสุ มา โสกา ปหโต ภวาติ ฯ
กสฺสโป เถโร ฯ
[๒๒๐] ๓ สีหปฺปมตฺโต วิหร รตฺตินฺทิวมตนฺทิโต
ภาเวหิ กุสลํ ธมฺมํ ชห สีฆํ สมุสฺสยนฺติ ฯ
สีโห เถโร ฯ
[๒๒๑] ๔ สพฺพรตฺตึ สุปิตฺวาน ทิวา สงฺคณิเก รโต
กุทาสฺสุ นาม ทุมฺเมโธ ทุกฺขสฺสนฺตํ กริสฺสตีติ ฯ
นีโต เถโร ฯ
[๒๒๒] ๕ จิตฺตนิมิตฺตสฺส โกวิโท ปวิเวกรสํ วิชานิย
ฌายํ นิปโก ปติสฺสโต อธิคจฺเฉยฺย สุขํ นิรามิสนฺติ ฯ
สุนาโค เถโร ฯ
[๒๒๓] ๖ อิโต พหิทฺธา ปุถุอญฺญวาทินํ
มคฺโค น นิพฺพานคโม ยถา อยํ
อิติสฺสุ สงฺฆํ ภควานุสาสติ
สตฺถา สยํ ปาณิตเลว ทสฺสยนฺติ ฯ
นาคิโต เถโร ฯ
[๒๒๔] ๗ ขนฺธา ทิฏฺฐา ยถาภูตํ ภวา สพฺเพ ปทาลิตา
วิกฺขีโณ ชาติสํสาโร นตฺถิทานิ ปุนพฺภโวติ ฯ
ปวิฏฺโฐ ๑ เถโร ฯ
#๑ โป. สวิฏฺโฐ ฯ