[๒๕๙] ๒ นยิทํ อนเยน ชีวิตํ นาหาโร หทยสฺส สนฺติโก

อาหารฏฺฐิติโก สมุสฺสโย อิติ ทิสฺวาน จรามิ เอสนํ ฯ

ปงฺโกติ หิ นํ อเวทยุํ ๑ ยายํ วนฺทนปูชนา กุเลสุ

สุขุมํ สลฺลํ ทุรุพฺพหํ สกฺกาโร กาปุริเสน ทุชฺชโหติ ฯ อิตฺถํ สุทํ อายสฺมา ปิณฺโฑลภารทฺวาโช เถโร คาถาโย อภาสิตฺถาติ ฯ

[๒๖๐] ๓ มกฺกโฏ ปญฺจทฺวารายํ กุฏิกายํ ปสกฺขิย ๒

ทฺวาเรน อนุปริเยติ ฆฏฺฏยนฺโต มุหุํ มุหุํ ฯ

ติฏฺฐ มกฺกฏ มา ธาวิ น หิ เต ตํ ยถา ปุเร

นิคฺคหิโตสิ ปญฺญาย เนว ๓ ทูรํ คมิสฺสสีติ ฯ

วลฺลิโย เถโร ฯ

[๒๖๑] ๔ ติณฺณํ เม ตาลปตฺตานํ คงฺคาตีเร กุฏี กตา

ฉวสิตฺโตว เม ปตฺโต ปํสุกูลญฺจ จีวรํ ฯ

ทฺวินฺนํ อนฺตรวสฺสานํ เอกวาจา เม ภาสิตา

ตติเย อนฺตรวสฺสมฺหิ ตโมกฺขนฺโธ ปทาลิโตติ ฯ

คงฺคาตีริโย เถโร ฯ

[๒๖๒] ๕ อปิ เจ โหติ เตวิชฺโช มจฺจุหายี อนาสโว

อปฺปญฺญาโตติ นํ พาลา อวชานนฺติ อชานกา ๔ ฯ

โย จ โข อนฺนปานสฺส ลาภี โหตีธ ปุคฺคโล

ปาปธมฺโมปิ เจ โหติ โส เนสํ โหติ สกฺกโตติ ฯ

อชิโน เถโร ฯ

#๑ ม. ปเวทยุํ ฯ ๒ โป. ม. ยุ. ปสกฺกิย ฯ ๓ ยุ. เนโต ฯ ๔ ม. ยุ. อชานตา ฯ