ยํ มยา ปกตํ ปาปํ ปุพฺเพ อญฺญาสุ ชาติสุ

ตนฺทานีธ ปวาเหมิ เอวํทิฏฺฐิ ปุเร อหุ ๑ ฯ

สุตฺวา สุภาสิตํ วาจํ ธมฺมตฺถสหิตํ ปทํ

ตถํ ยาถาวตํ ๒ อตฺถํ โยนิโส ปจฺจเวกฺขิสํ ฯ

นินฺหาตสพฺพปาโปมฺหิ นิมฺมโล ปยโต สุจิ

สุทฺโธ พุทฺธสฺส ๓ ทายาโท ปุตฺโต พุทฺธสฺส โอรโส ฯ

โอคยฺหฏฺฐงฺคิกํ โสตํ สพฺพํ ปาปํ ปวาหยึ

ติสฺโส วิชฺชา อชฺฌคมึ กตํ พุทฺธสฺส สาสนนฺติ ฯ

คยากสฺสโป เถโร ฯ

[๓๔๒] ๘ วาตโรคาภินีโต ตฺวํ วิหรํ กานเน วเน

ปวิฏฺฐโคจเร ๔ ลูเข กถํ ภิกฺขุ กริสฺสสิ ฯ

ปีติสุเขน วิปุเลน ผรมาโน สมุสฺสยํ

ลูขมฺปิ อภิสมฺโภนฺโต วิหริสฺสามิ กานเน ฯ

ภาเวนฺโต สติปฏฺฐาเน อินฺทฺริยานิ พลานิ จ

โพชฺฌงฺคานิ จ ภาเวนฺโต วิหริสฺสามิ กานเน ฯ

อารทฺธวิริเย ปหิตตฺเต นิจฺจํ ทฬฺหปรกฺกเม

สมคฺเค สหิเต ทิสฺวา วิหริสฺสามิ กานเน ฯ

อนุสฺสรนฺโต สมฺพุทฺธํ อตฺตทนฺทํ ๕ สมาหิตํ #๑ ม. ยุ. อหุํ ฯ ๒ ม. ยาถาวกํ ฯ ยุ. ยถาวกํ ฯ ๓ ม. ยุ. สุทฺธสฺส ฯ #๔ ยุ. ปวิทฺธโคจเร ฯ ๕ โป. ยุ. อคฺคทนฺตํ ฯ ม. อคฺคํ ทนฺตํ ฯ