ตณฺหาย มูลํ ขณถ อุสีรตฺโถว วีรณํ

มา โว นฬํว โสโตว มาโร ภญฺชิ ปุนปฺปุนํ ฯ

กโรถ พุทฺธวจนํ ขโณ เว ๑ มา อุปจฺจคา

ขณาตีตา หิ โสจนฺติ นิรยมฺหิ สมปฺปิตา ฯ

ปมาโท รโช ๒ ปมาทานุปติโต รโช

อปฺปมาเทน วิชฺชาย อพฺพุเห ๓ สลฺลมตฺตโนติ ฯ

มาลุงฺกฺยปุตฺโต เถโร ฯ

[๓๕๒] ๖ ปณฺณวีสติวสฺสานิ ยโต ปพฺพชิโต อหํ

อจฺฉราสงฺฆาตมตฺตมฺปิ เจโตสนฺติมนชฺฌคํ ฯ

อลทฺธา จิตฺตสฺเสกคฺคํ กามราเคน อทฺทิโต ๔-

พาหา ปคฺคยฺห กนฺทนฺโต วิหารานุปนิกฺขมึ ๕ ฯ

สตฺถํ วา อาหริสฺสามิ โก อตฺโถ ชีวิเตน เม

กถํ หิ สิกฺขํ ปจฺจกฺขํ กาลํ กุพฺเพถ มาทิโส ฯ

ตทาหํ ขุรมาทาย มญฺจกมฺหิ อุปาวิสึ

ปรินีโต ขุโร อาสิ ธมนึ เฉตฺตุมตฺตโน ฯ

ตโต เม มนสีกาโร โยนิโส อุทปชฺชถ

อาทีนโว ปาตุรหุ นิพฺพิทา สมติฏฺฐถ ฯ

ตโต จิตฺตํ วิมุจฺจิ เม ปสฺส ธมฺมสุธมฺมตํ #๑ ม. ขโณ โว ฯ ๒ สุตฺตนิปาเต ปมาทาติ ปาโฐ ทิสฺสติ ฯ ๓ ยุ. อพฺพเห ฯ #อพฺพูเฬฺหติปิ ปาโฐ ฯ ๔ ม. อฏฺฏิโต ฯ ๕ ม. วิหารา อุปนิกฺขมึ ฯ