วนฺทึ อรหโต ปาเท โคตมสฺส ยสสฺสิโน

สาหํ วนฺทิตฺวา ปาทานิ จุตา จณฺฑาลโยนิยา

วิมานํ สพฺพโส ภทฺทํ อุปปนฺนมฺหิ นนฺทเน

อจฺฉรานํ สหสฺสานิ ปุรกฺขิตฺวา มํ ติฏฺฐนฺติ

ตาสาหํ ปวรา เสฏฺฐา วณฺเณน ยสสายุนา

ปหูตกตกลฺยาณา สมฺปชานา ปติสฺสตา

มุนึ การุณิกํ โลเก ภนฺเต วนฺทิตุมาคตาติ

อิทํ วตฺวาน จณฺฑาลี กตญฺญุกตเวทินี

วนฺทิตฺวา อรหโต ปาเท ตตฺเถวนฺตรธายตีติ ฯ

จณฺฑาลิวิมานํ จตุตฺถํ ฯ

[๒๒] ๕ นีลา ปีตา จ กาฬา จ มญฺชิฏฺฐา อถ โลหิตา

อุจฺจาวจานํ วณฺณานํ กิญฺชกฺขปริวาริตา

มนฺทารวานํ ปุปฺผานํ มาลํ ธาเรสิ มุทฺธนิ

นยิเม อญฺเญสุ กาเยสุ รุกฺขา สนฺติ สุเมธเส

เกน กายํ อุปปนฺนา ตาวตึสํ ยสสฺสินี

เทวเต ปุจฺฉิตาจิกฺข กิสฺส กมฺมสฺสิทํ ผลํ (อิติ) ฯ

ภทฺทิตฺถิกาติ มํ อญฺญึสุ กิมฺพิลายํ อุปาสิกา

สทฺธาสีเลน สมฺปนฺนา สํวิภาครตา สทา

อจฺฉาทนญฺจ ภตฺตญฺจ เสนาสนํ ปทีปิยํ

อทาสึ อุชุภูเตสุ วิปฺปสนฺเนน เจตสา