ตุวํ พุทฺโธ ตุวํ สตฺถา ตุวํ มาราภิภู มุนิ

ตุวํ อนุสเย เฉตฺวา ติณฺโณ ตาเรสิมํ ปชํ ฯ

อุปธี เต สมติกฺกนฺตา อาสวา เต ปทาลิตา

สีโหว อนุปาทาโน ปหีนภยเภรโว ฯ

ภิกฺขโว ติสตา อิเม ติฏฺฐนฺตี ปญฺชลีกตา

ปาเท วีร ปสาเรหิ นาคา วนฺทนฺตุ สตฺถุโนติ ฯ

เสโล เถโร ฯ

[๓๙๑] ๗ ยา ตํ เม หตฺถิคีวาย สุขุมา วตฺถา ปธาริตา

สาลีนํ โอทโน ภุตฺโต สุจิมํสูปเสจโน ฯ

โสชฺช ภทฺโท สาตติโก อุญฺฉาปตฺตาคเต รโต

ฌายติ อนุปาทาโน ปุตฺโต โคธาย ภทฺทิโย ฯ

ปํสุกูลี สาตติโก อุญฺฉาปตฺตาคเต รโต

ฌายติ อนุปาทาโน ปุตฺโต โคธาย ภทฺทิโย ฯ

ปิณฺฑปาตี สาตติโก .................

เตจีวรี สาตติโก .................

สปทานจารี สาตติโก .................

เอกาสนี สาตติโก .................

ปตฺตปิณฺฑี สาตติโก .................

ขลุปจฺฉาภตฺตี สาตติโก .................

อารญฺญิโก สาตติโก .................