จณฺฑาลี ภทฺทิตฺถิกา เจว โสณทินฺนา อุโปสถา

นิทฺทา เจว สุทินฺนา จ เทฺว จ ภิกฺขายทายิกา

วคฺโค เตน ปวุจฺจตีติ ฯ

อิตฺถิวิมาเน ทุติโย วคฺโค ฯ

ภาณวารํ ปฐมํ ฯ

________________

ตติโย ปาริฉตฺตกวคฺโค

[๒๙] ๑ อุฬาโร เต ยโส วณฺโณ สพฺพา โอภาสเต ทิสา

นาริโย นจฺจนฺติ คายนฺติ เทวปุตฺตา อลงฺกตา

โมทนฺติ ปริวาเรนฺติ ตว ปูชาย เทวเต

โสวณฺณานิ วิมานานิ ตวิมานิ สุทสฺสเน

ตุวํปิ อิสฺสรา เตสํ สพฺพกามสมิทฺธินํ

อภิชาตา มหนฺตาสิ เทวกาเย ปโมทสิ

เทวเต ปุจฺฉิตาจิกฺข ยสฺส กมฺมสฺสิทํ ผลนฺติ ฯ

อหํ มนุสฺเสสุ มนุสฺสภูตา

ทุสฺสีเล กุเล สุณิสา อโหสึ

อสฺสทฺเธสุ กทริเยสุ สทฺธาสีเลน สมฺปนฺนา

[๑]

ปิณฺฑาย จรมานสฺส อปูวํ เต อทาสิหํ

ตสฺส อทาสิหํ ๒ ปูวํ ปสนฺนา สเกหิ ปาณิหิ #๑ โป. ม. ยุ. ตทาหํ สสฺสุยาจิกฺขึ สมโณ อาคโต อิธ ฯ ๒ ม. ยุ. อทาสหํ ฯ