อิติสฺสา สสฺสุ ปริภาสิ อวินีตา ตฺวํ วธู
น มํ สมฺปุจฺฉิตุํ อิจฺฉิ สมณสฺส ททามหํ
ตโต เม สสฺสุ กุปิตา ปหาสิ มุสเลน มํ
กุฏงฺคญฺฉิ อวธิ มํ นาสกฺขึ ชีวิตุํ จิรํ
สาหํ กายสฺส เภทา จ วิปฺปมุตฺตา ตโต จุตา
ตาวตึสานํ เทวานํ อุปปนฺนา สหพฺยตํ
เตน เมตาทิโส วณฺโณ ... เป ...
วณฺโณ จ เม สพฺพทิสา ปภาสตีติ ฯ
อุฬารวิมานํ ปฐมํ ฯ
[๓๐] ๒ โอภาสยิตฺวา ปฐวึ สเทวกํ
อติโรจสิ จนฺทิมสุริยา วิย
สิริยา จ วณฺเณน ยเสน เตชสา
พฺรหฺมาว เทวิ ติทเส สหินฺทเก
ปุจฺฉามิ ตํ อุปฺปลมาลธารินิ
อาเวฬินิ กญฺจนสนฺนิภตฺตเจ
อลงฺกเต อุตฺตมวตฺถธารินิ
กา ตฺวํ สุเภ เทวเต วนฺทเส มมํ
กึ ตฺวํ ปุเร กมฺมํ อกาสิ อตฺตนา
มนุสฺสภูตา ปุริมาย ชาติยา
ทานํ สุจิณฺณํ อถ สีลสญฺญมํ
