[๔๔๕] ๗ อคารสฺมึ วสนฺตีหํ ธมฺมํ สุตฺวาน ภิกฺขุโน

อทฺทสํ วิรชํ ธมฺมํ นิพฺพานํ ปทมจฺจุตํ ฯ

สาหํ ปุตฺตํ ธีตรญฺจ ธนธญฺญญฺจ ฉฑฺฑิย

เกเส เฉทาปยิตฺวาน ปพฺพชึ อนคาริยํ ฯ

สิกฺขมานา อหํ สนฺตี ภาเวนฺตี มคฺคมญฺชสํ

ปหาสึ ราคโทสญฺจ ตเทกฏฺเฐ จ อาสเว ฯ

ภิกฺขุนี อุปสมฺปชฺช ปุพฺพชาติมนุสฺสรึ

ทิพฺพจกฺขุํ วิโสธิตํ วิมลํ สาธุภาวิตํ ฯ

สงฺขาเร ปรโต ทิสฺวา เหตุชาเต ปโลกิเน

ปหาสึ อาสเว สพฺเพ สีติภูตมฺหิ นิพฺพุตา ฯ

สกุลา ฯ

[๔๔๖] ๘ ทส ปุตฺเต วิชายิตฺวา อสฺมึ รูปสมุสฺสเย

ตโตหํ ทุพฺพลา ชิณฺณา ภิกฺขุนึ อุปสงฺกมึ ฯ

สา เม ธมฺมมเทเสสิ ขนฺธายตนธาตุโย

ตสฺสา ธมฺมํ สุณิตฺวาน เกเส เฉตฺวาน ปพฺพชึ ฯ

ตสฺสา เม สิกฺขมานาย ทิพฺพจกฺขุํ วิโสธิตํ

ปุพฺเพนิวาสํ ชานามิ ยตฺถ เม วุสิตํ ปุเร ฯ

อนิมิตฺตญฺจ ภาเวมิ เอกคฺคา สุสมาหิตา

อนนฺตราวิโมกฺขาสึ อนุปาทาย นิพฺพุตา ฯ

ปญฺจกฺขนฺธา ปริญฺญาตา ติฏฺฐนฺติ ฉินฺนมูลกา