ตสฺสาหํ วจนํ สุตฺวา กโรนฺตี อนุสาสนึ
รตฺติยา ปุริเม ยาเม ปุพฺพชาติมนุสฺสรึ
รตฺติยา มชฺฌิเม ยาเม ทิพฺพจกฺขุํ วิโสธยึ
รตฺติยา ปจฺฉิเม ยาเม ตโมกฺขนฺธํ ปทาลยึ
ปีติสุเขน จ กายํ ผริตฺวา วิหรึ ตทา
สตฺตมิยา ปาเท ปสาเรสึ ๑ ตโมกฺขนฺธํ ปทาลิย ฯ
วิชยา ฯ
ฉกฺกนิปาโต สมตฺโต ฯ
______________________
เถรีคาถาย สตฺตกนิปาโต
[๔๕๙] ๑ มุสลานิ คเหตฺวาน ธญฺญํ โกฏฺเฏนฺติ มาณวา
ปุตฺตทารานิ โปเสนฺตา ธนํ วินฺทนฺติ มาณวา ฯ
ฆเฏถ พุทฺธสาสเน ยํ กตฺวา นานุตปฺปติ
ขิปฺปํ ปาทานิ โธวิตฺวา เอกมนฺตํ นิสีทถ ฯ
จิตฺตํ อุปฏฺฐเปตฺวาน เอกคฺคํ สุสมาหิตํ
ปจฺจเวกฺขถ สงฺขาเร ปรโต โน จ อตฺตโต ฯ
ตสฺสาหํ วจนํ สุตฺวา ปฏาจารานุสาสนึ
ปาเท ปกฺขาลยิตฺวาน เอกมนฺเต อุปาวิสึ ฯ #๑ ยุ. ปสาเรมิ ฯ