“Udakañhi nayanti nettikā, Usukārā namayanti tejanaṁ; Dāruṁ namayanti tacchakā, Attānaṁ damayanti subbatā”ti. … Kulo thero …. Ekakanipāta Dutiyavagga Ajitattheragāthā “Maraṇe me bhayaṁ natthi, nikanti natthi jīvite; Sandehaṁ nikkhipissāmi, sampajāno paṭissato”ti. … Ajito thero … vaggo dutiyo. Tassuddānaṁ Cūḷavaccho mahāvaccho, vanavaccho ca sīvako; Kuṇḍadhāno ca belaṭṭhi, dāsako ca tatopari; Siṅgālapitiko thero, kulo ca ajito dasāti. Ekakanipāta Tatiyavagga Nigrodhattheragāthā “Nāhaṁ bhayassa bhāyāmi, Satthā no amatassa kovido; Yattha bhayaṁ nāvatiṭṭhati, Tena maggena vajanti bhikkhavo”ti. … Nigrodho thero …. Ekakanipāta Tatiyavagga Cittakattheragāthā “Nīlā sugīvā sikhino, Morā kārambhiyaṁ abhinadanti; Te sītavātakīḷitā, Suttaṁ jhāyaṁ nibodhentī”ti. … Cittako thero …. Ekakanipāta Tatiyavagga Gosālattheragāthā