[๒๒๙] ๒ ยสฺสาสวา ปริกฺขีณา อาหาเร จ อนิสฺสิโต

สุญฺญโต อนิมิตฺโต จ วิโมกฺโข ยสฺส โคจโร

อากาเสว สกุนฺตานํ ปทนฺตสฺส ทุรนฺวยนฺติ ฯ

วิชโย เถโร ฯ

[๒๓๐] ๓ ทุกฺขา กามา เอรก น สุขา กามา เอรก

โย กาเม กามยติ ทุกฺขํ โส กามยติ เอรก

โย กาเม น กามยติ ทุกฺขํ โส น กามยติ เอรกาติ ฯ

เอรโก เถโร ฯ

[๒๓๑] ๔ นโม หิ ตสฺส ภควโต สกฺยปุตฺตสฺส สิรีมโต

เตนายํ อคฺคปุตฺเตน ๑ อคฺคธมฺโม สุเทสิโตติ ฯ

เมตฺตชิ เถโร ฯ

[๒๓๒] ๕ อนฺโธหํ หตเนตฺโตสฺมิ กนฺตารทฺธาน ปกฺขนฺโต ๒

สยมาโนปิ คมิสฺสํ ๓ น สหาเยน ปาเปนาติ ฯ

จกฺขุปาโล เถโร ฯ

[๒๓๓] ๖ เอกํ ปุปฺผํ จชิตฺวาน อสีติวสฺสโกฏิโย ๔

สคฺเคสุ ปริจาเรตฺวา เสสเกนมฺหิ นิพฺพุโตติ ฯ

ขณฺฑสุมโน เถโร ฯ

[๒๓๔] ๗ หิตฺวา สตปลํ กํสํ โสวณฺณํ สตราชิกํ

อคฺคหึ มตฺติกาปตฺตํ อิทํ ทุติยาภิเสจนนฺติ ฯ

ติสฺโส เถโร ฯ

#๑ ม. ยุ. อคฺคปตฺเตน ฯ ๒ สี. ยุ. ปกฺขนฺโน ฯ ม. ปกฺขนฺโท ฯ #๓ ม. ยุ. คจฺฉิสฺสํ ฯ ๔ สี. ยุ. อสีตึ วสฺสโกฏิโย ฯ