ตโต นํ ทุกฺขมเนฺวติ สพฺพโสเตหิ ปญฺจหิ ฯ
ปุพฺพโลหิตสมฺปุณฺณํ พหุสฺส กุณปสฺส จ
นรวีรกตํ วคฺคุํ สมุคฺคมิว จิตฺติตํ ฯ
กฏุกํ มธุรสฺสาทํ ปิยนิพนฺธนํ ทุกฺขํ ๑
ขุรํว มธุนาลิตฺตํ อุลฺลิตฺตํ นาวพุชฺฌติ ฯ
อิตฺถิรูเป อิตฺถิรเส โผฏฺฐพฺเพปิจ อิตฺถิยา
อิตฺถิคนฺเธสุ สารตฺโต วิวิธํ วินฺทเต ทุกฺขํ ๑ ฯ
อิตฺถิโสตานิ สพฺพานิ สนฺทนฺติ ปญฺจปญฺจสุ
เตสมาวรณํ กาตุํ โย สกฺโกติ วิริยวา ฯ
โส อตฺถวา โส ธมฺมฏฺโฐ โส ทกฺโข โส วิจกฺขโณ
กเรยฺย รมมาโน หิ กิจฺจํ ธมฺมตฺถสํหิตํ ฯ
อโถ สีทติ สญฺญุตฺตํ วชฺเช กิจฺจํ นิรตฺถกํ
น ตํ กิจฺจนฺติ มญฺญิตฺวา อปฺปมตฺโต วิจกฺขโณ ฯ
ยญฺจ อตฺเถน สญฺญุตฺตํ ยา จ ธมฺมคตา รติ
ตํ สมาทาย วตฺเตถ สา หิ เว อุตฺตมา รติ ฯ
อุจฺจาวเจหุปาเยหิ ปเรสมภิชิคีสาติ
หนฺตฺวา วธิตฺวา อถ โสจยิตฺวา
อาโลปติ สาหสา โย ปเรสํ ฯ
ตจฺฉนฺโต อาณิยา อาณึ นิหนฺติ พลวา ยถา #๑ ม. ยุ. ทุขํ ฯ