Atthi arahato asuci sukkavissaṭṭhīti? Āmantā. Kenaṭṭhenāti? Handa hi mārakāyikā devatā arahato asuciṁ sukkavissaṭṭhiṁ upasaṁharantīti. Mārakāyikā devatā arahato asuciṁ sukkavissaṭṭhiṁ upasaṁharantīti? Āmantā. Atthi mārakāyikānaṁ devatānaṁ asuci sukkavissaṭṭhīti? Na hevaṁ vattabbe …pe…. Natthi mārakāyikānaṁ devatānaṁ asuci sukkavissaṭṭhīti? Āmantā. Hañci natthi mārakāyikānaṁ devatānaṁ asuci sukkavissaṭṭhi, no ca vata re vattabbe— “mārakāyikā devatā arahato asuciṁ sukkavissaṭṭhiṁ upasaṁharantī”ti. Mārakāyikā devatā arahato asuciṁ sukkavissaṭṭhiṁ upasaṁharantīti? Āmantā. Mārakāyikā devatā attano asuciṁ sukkavissaṭṭhiṁ upasaṁharanti, aññesaṁ asuciṁ sukkavissaṭṭhiṁ upasaṁharanti, tassa asuciṁ sukkavissaṭṭhiṁ upasaṁharantīti? Na hevaṁ vattabbe …pe…. Mārakāyikā devatā neva attano na aññesaṁ na tassa asuciṁ sukkavissaṭṭhiṁ upasaṁharantīti? Āmantā. Hañci mārakāyikā devatā neva attano na aññesaṁ na tassa asuciṁ sukkavissaṭṭhiṁ upasaṁharanti, no ca vata re vattabbe— “mārakāyikā devatā arahato asuciṁ sukkavissaṭṭhiṁ upasaṁharantī”ti.