Na vattabbaṁ— “samāpanno assādeti, jhānanikanti jhānārammaṇā”ti? Āmantā. Nanu vuttaṁ bhagavatā— “idha, bhikkhave, bhikkhu vivicceva kāmehi vivicca akusalehi dhammehi paṭhamaṁ jhānaṁ upasampajja viharati, so taṁ assādeti taṁ nikāmeti tena ca vittiṁ āpajjati; vitakkavicārānaṁ vūpasamā …pe… dutiyaṁ jhānaṁ …pe… tatiyaṁ jhānaṁ …pe… catutthaṁ jhānaṁ upasampajja viharati, so taṁ assādeti taṁ nikāmeti tena ca vittiṁ āpajjatī”ti. Attheva suttantoti? Āmantā. Tena hi samāpanno assādeti, jhānanikanti jhānārammaṇāti. Samāpanno assādetikathā niṭṭhitā. Mahāpaṇṇāsaka Terasamavagga Asātarāgakathā Atthi asātarāgoti? Āmantā. Dukkhābhinandino sattā, atthi keci dukkhaṁ patthenti pihenti esanti gavesanti pariyesanti, dukkhaṁ ajjhosāya tiṭṭhantīti? Na hevaṁ vattabbe …pe… nanu sukhābhinandino sattā, atthi keci sukhaṁ patthenti pihenti esanti gavesanti pariyesanti, sukhaṁ ajjhosāya tiṭṭhantīti? Āmantā. Hañci sukhābhinandino sattā, atthi keci sukhaṁ patthenti pihenti esanti gavesanti pariyesanti, sukhaṁ ajjhosāya tiṭṭhanti, no ca vata re vattabbe— “atthi asātarāgo”ti. Atthi asātarāgoti? Āmantā. Dukkhāya vedanāya rāgānusayo anuseti, sukhāya vedanāya paṭighānusayo anusetīti? Na hevaṁ vattabbe …pe… nanu sukhāya vedanāya rāgānusayo anuseti, dukkhāya vedanāya paṭighānusayo anusetīti? Āmantā. Hañci sukhāya vedanāya rāgānusayo anuseti, dukkhāya vedanāya paṭighānusayo anuseti, no ca vata re vattabbe— “atthi asātarāgo”ti.