Akusalānaṁ dhammānaṁ jarāmaraṇaṁ, na vattabbaṁ— “kusalānaṁ dhammānaṁ vipāko”ti? Āmantā. Kusalānaṁ dhammānaṁ jarāmaraṇaṁ, na vattabbaṁ— “akusalānaṁ dhammānaṁ vipāko”ti? Na hevaṁ vattabbe …pe…. Kusalānañca akusalānañca dhammānaṁ jarāmaraṇaṁ, akusalānaṁ dhammānaṁ vipākoti? Āmantā. Kusalānañca akusalānañca dhammānaṁ jarāmaraṇaṁ, kusalānaṁ dhammānaṁ vipākoti? Na hevaṁ vattabbe …pe…. Kusalānañca akusalānañca dhammānaṁ jarāmaraṇaṁ, na vattabbaṁ— “kusalānaṁ dhammānaṁ vipāko”ti? Āmantā. Kusalānañca akusalānañca dhammānaṁ jarāmaraṇaṁ, na vattabbaṁ— “akusalānaṁ dhammānaṁ vipāko”ti? Na hevaṁ vattabbe …pe…. Na vattabbaṁ— “jarāmaraṇaṁ vipāko”ti? Āmantā. Nanu atthi dubbaṇṇasaṁvattaniyaṁ kammaṁ appāyukasaṁvattaniyaṁ kammanti? Āmantā. Hañci atthi dubbaṇṇasaṁvattaniyaṁ kammaṁ appāyukasaṁvattaniyaṁ kammaṁ, tena vata re vattabbe— “jarāmaraṇaṁ vipāko”ti. Jarāmaraṇaṁ vipākotikathā niṭṭhitā. Mahāpaṇṇāsaka Sattamavagga Ariyadhammavipākakathā