Saññaṁ upādāya … saṅkhāre upādāya … viññāṇaṁ upādāya puggalassa paññattīti? Āmantā. Kusalaṁ viññāṇaṁ upādāya kusalassa puggalassa paññattīti? Na hevaṁ vattabbe …pe… kusalaṁ viññāṇaṁ upādāya kusalassa puggalassa paññattīti? Āmantā. Kusalaṁ viññāṇaṁ saphalaṁ savipākaṁ iṭṭhaphalaṁ kantaphalaṁ manuññaphalaṁ asecanakaphalaṁ sukhudrayaṁ sukhavipākanti? Āmantā. Kusalopi puggalo saphalo savipāko iṭṭhaphalo kantaphalo manuññaphalo asecanakaphalo sukhudrayo sukhavipākoti? Na hevaṁ vattabbe …pe…. Viññāṇaṁ upādāya puggalassa paññattīti? Āmantā. Akusalaṁ viññāṇaṁ upādāya akusalassa puggalassa paññattīti? Na hevaṁ vattabbe …pe… akusalaṁ viññāṇaṁ upādāya akusalassa puggalassa paññattīti? Āmantā. Akusalaṁ viññāṇaṁ saphalaṁ savipākaṁ aniṭṭhaphalaṁ akantaphalaṁ amanuññaphalaṁ secanakaphalaṁ dukkhudrayaṁ dukkhavipākanti? Āmantā. Akusalopi puggalo saphalo savipāko aniṭṭhaphalo akantaphalo amanuññaphalo secanakaphalo dukkhudrayo dukkhavipākoti? Na hevaṁ vattabbe …pe…. Viññāṇaṁ upādāya puggalassa paññattīti? Āmantā. Abyākataṁ viññāṇaṁ upādāya abyākatassa puggalassa paññattīti? Na hevaṁ vattabbe …pe… abyākataṁ viññāṇaṁ upādāya abyākatassa puggalassa paññattīti? Āmantā. Abyākataṁ viññāṇaṁ aniccaṁ saṅkhataṁ paṭiccasamuppannaṁ khayadhammaṁ vayadhammaṁ virāgadhammaṁ nirodhadhammaṁ vipariṇāmadhammanti? Āmantā. Abyākatopi puggalo anicco saṅkhato paṭiccasamuppanno khayadhammo vayadhammo virāgadhammo nirodhadhammo vipariṇāmadhammoti? Na hevaṁ vattabbe …pe….