Kusalena cittena samuṭṭhitaṁ rūpāyatanaṁ anārammaṇaṁ phassavippayuttaṁ abyākatanti? Āmantā. Kusalena cittena samuṭṭhitaṁ kāyakammaṁ rūpaṁ anārammaṇaṁ phassavippayuttaṁ abyākatanti? Na hevaṁ vattabbe …pe… kusalena cittena samuṭṭhitaṁ saddāyatanaṁ …pe… gandhāyatanaṁ … rasāyatanaṁ … phoṭṭhabbāyatanaṁ …pe… pathavīdhātu … āpodhātu … tejodhātu …pe… vāyodhātu anārammaṇā phassavippayuttā abyākatāti? Āmantā. Kusalena cittena samuṭṭhitaṁ kāyakammaṁ rūpaṁ anārammaṇaṁ phassavippayuttaṁ abyākatanti? Na hevaṁ vattabbe …pe…. Kusalena cittena samuṭṭhitaṁ vacīkammaṁ rūpaṁ kusalanti? Āmantā. Sārammaṇaṁ, atthi tassa āvaṭṭanā …pe… paṇidhīti? Na hevaṁ vattabbe …pe… nanu anārammaṇaṁ, natthi tassa āvaṭṭanā …pe… paṇidhīti? Āmantā. Hañci anārammaṇaṁ, natthi tassa āvaṭṭanā …pe… paṇidhi; no ca vata re vattabbe— “kusalena cittena samuṭṭhitaṁ vacīkammaṁ rūpaṁ kusalan”ti. Kusalena cittena samuṭṭhito phasso kusalo sārammaṇo, atthi tassa āvaṭṭanā …pe… paṇidhīti? Āmantā. Kusalena cittena samuṭṭhitaṁ vacīkammaṁ rūpaṁ kusalaṁ sārammaṇaṁ, atthi tassa āvaṭṭanā …pe… paṇidhīti? Na hevaṁ vattabbe …pe… kusalena cittena samuṭṭhitā vedanā …pe… saññā … cetanā … saddhā … vīriyaṁ … sati … samādhi …pe… paññā kusalā sārammaṇā, atthi tāya āvaṭṭanā …pe… paṇidhīti? Āmantā. Kusalena cittena samuṭṭhitaṁ vacīkammaṁ rūpaṁ kusalaṁ sārammaṇaṁ, atthi tassa āvaṭṭanā …pe… paṇidhīti? Na hevaṁ vattabbe …pe….