Na vattabbaṁ— “parihāyati arahā arahattā”ti? Āmantā. Nanu vuttaṁ bhagavatā— “pañcime, bhikkhave, dhammā samayavimuttassa bhikkhuno parihānāya saṁvattanti. Katame pañca? Kammārāmatā, bhassārāmatā, niddārāmatā, saṅgaṇikārāmatā, yathāvimuttaṁ cittaṁ na paccavekkhati. Ime kho, bhikkhave, pañca dhammā samayavimuttassa bhikkhuno parihānāya saṁvattantī”ti. Attheva suttantoti? Āmantā. Tena hi parihāyati arahā arahattāti. Atthi arahato kammārāmatāti? Na hevaṁ vattabbe. Atthi arahato kammārāmatāti? Āmantā. Atthi arahato rāgo kāmarāgo kāmarāgapariyuṭṭhānaṁ kāmarāgasaṁyojanaṁ kāmogho kāmayogo kāmacchandanīvaraṇanti? Na hevaṁ vattabbe. Atthi arahato bhassārāmatā, atthi arahato niddārāmatā, atthi arahato saṅgaṇikārāmatāti? Na hevaṁ vattabbe. Atthi arahato saṅgaṇikārāmatāti? Āmantā. Atthi arahato rāgo kāmarāgo kāmarāgapariyuṭṭhānaṁ kāmarāgasaṁyojanaṁ kāmogho kāmayogo kāmacchandanīvaraṇanti? Na hevaṁ vattabbe. Parihāyati arahā arahattāti? Āmantā. Arahā arahattā parihāyamāno kiṁ pariyuṭṭhito parihāyatīti? Rāgapariyuṭṭhito parihāyatīti. Pariyuṭṭhānaṁ kiṁ paṭicca uppajjatīti? Anusayaṁ paṭicca uppajjatīti. Atthi arahato anusayāti? Na hevaṁ vattabbe.