Vedanaṁ upādāya puggalassa paññattīti? Āmantā. Akusalaṁ vedanaṁ upādāya akusalassa puggalassa paññattīti? Na hevaṁ vattabbe …pe… akusalaṁ vedanaṁ upādāya akusalassa puggalassa paññattīti? Āmantā. Akusalā vedanā saphalā savipākā aniṭṭhaphalā akantaphalā amanuññaphalā secanakaphalā dukkhudrayā dukkhavipākāti? Āmantā. Akusalopi puggalo saphalo savipāko aniṭṭhaphalo akantaphalo amanuññaphalo secanakaphalo dukkhudrayo dukkhavipākoti? Na hevaṁ vattabbe …pe…. Vedanaṁ upādāya puggalassa paññattīti? Āmantā. Abyākataṁ vedanaṁ upādāya abyākatassa puggalassa paññattīti? Na hevaṁ vattabbe …pe… abyākataṁ vedanaṁ upādāya abyākatassa puggalassa paññattīti? Āmantā. Abyākatā vedanā aniccā saṅkhatā paṭiccasamuppannā khayadhammā vayadhammā virāgadhammā nirodhadhammā vipariṇāmadhammāti? Āmantā. Abyākatopi puggalo anicco saṅkhato paṭiccasamuppanno khayadhammo vayadhammo virāgadhammo nirodhadhammo vipariṇāmadhammoti? Na hevaṁ vattabbe …pe….