Atthi koci kāye kāyānupassī viharatīti katvā tena ca kāraṇena puggalo upalabbhati saccikaṭṭhaparamatthenāti? Āmantā. Añño kāyo, añño kāye kāyānupassī viharatīti? Na hevaṁ vattabbe …pe… aññā vedanā … aññaṁ cittaṁ … aññe dhammā, añño dhammesu dhammānupassī viharatīti? Na hevaṁ vattabbe …pe…. Puggalo upalabbhati saccikaṭṭhaparamatthenāti? Āmantā. Nanu vuttaṁ bhagavatā— “Suññato lokaṁ avekkhassu, mogharāja sadā sato; Attānudiṭṭhiṁ ūhacca, evaṁ maccutaro siyā; Evaṁ lokaṁ avekkhantaṁ, maccurājā na passatī”ti. Attheva suttantoti? Āmantā. Tena hi na vattabbaṁ— “puggalo upalabbhati saccikaṭṭhaparamatthenā”ti. Puggalo avekkhatīti? Āmantā. Saha rūpena avekkhati, vinā rūpena avekkhatīti? Saha rūpena avekkhatīti. Taṁ jīvaṁ taṁ sarīranti? Na hevaṁ vattabbe …pe… vinā rūpena avekkhatīti, aññaṁ jīvaṁ aññaṁ sarīranti? Na hevaṁ vattabbe …pe…. Puggalo avekkhatīti? Āmantā. Abbhantaragato avekkhati, bahiddhā nikkhamitvā avekkhatīti? Abbhantaragato avekkhatīti. Taṁ jīvaṁ taṁ sarīranti? Na hevaṁ vattabbe …pe… bahiddhā nikkhamitvā avekkhatīti, aññaṁ jīvaṁ aññaṁ sarīranti? Na hevaṁ vattabbe …pe….