Ekadesaṁ vimuttaṁ, ekadesaṁ avimuttanti? Āmantā. Ekadesaṁ anāgāmī, ekadesaṁ na anāgāmī, ekadesaṁ anāgāmiphalappatto paṭiladdho adhigato sacchikato upasampajja viharati, kāyena phusitvā viharati, ekadesaṁ na kāyena phusitvā viharati, ekadesaṁ antarāparinibbāyī, upahaccaparinibbāyī, asaṅkhāraparinibbāyī, sasaṅkhāraparinibbāyī, uddhaṁsotoakaniṭṭhagāmī, ekadesaṁ na uddhaṁsotoakaniṭṭhagāmīti? Na hevaṁ vattabbe …pe…. Ekadesaṁ vimuttaṁ, ekadesaṁ avimuttanti? Āmantā. Ekadesaṁ arahā ekadesaṁ na arahā, ekadesaṁ arahattappatto paṭiladdho adhigato sacchikato upasampajja viharati, kāyena phusitvā viharati, ekadesaṁ na kāyena phusitvā viharati, ekadesaṁ vītarāgo vītadoso vītamoho …pe… ekadesaṁ sacchikātabbaṁ sacchikataṁ, ekadesaṁ sacchikātabbaṁ na sacchikatanti? Na hevaṁ vattabbe …pe…. Vimuttaṁ vimuccamānanti? Āmantā. Uppādakkhaṇe vimuttaṁ, bhaṅgakkhaṇe vimuccamānanti? Na hevaṁ vattabbe …pe…. Na vattabbaṁ— “vimuttaṁ vimuccamānan”ti? Āmantā. Nanu vuttaṁ bhagavatā— “tassa evaṁ jānato evaṁ passato kāmāsavāpi cittaṁ vimuccati, bhavāsavāpi cittaṁ vimuccati, avijjāsavāpi cittaṁ vimuccatī”ti. Attheva suttantoti? Āmantā. Tena hi vattabbaṁ— “vimuttaṁ vimuccamānan”ti.