Sotāpannassa sakkāyadiṭṭhi pahīnā, na parihāyati sotāpanno sotāpattiphalāti? Āmantā. Arahato rāgo pahīno, na parihāyati arahā arahattāti? Na hevaṁ vattabbe. Sotāpannassa sakkāyadiṭṭhi pahīnā, na parihāyati sotāpanno sotāpattiphalāti? Āmantā. Arahato doso pahīno …pe… anottappaṁ pahīnaṁ, na parihāyati arahā arahattāti? Na hevaṁ vattabbe. Sotāpannassa vicikicchā pahīnā …pe… apāyagamanīyo moho pahīno, na parihāyati sotāpanno sotāpattiphalāti? Āmantā. Arahato rāgo pahīno …pe… anottappaṁ pahīnaṁ, na parihāyati arahā arahattāti? Na hevaṁ vattabbe. Sakadāgāmissa sakkāyadiṭṭhi pahīnā, na parihāyati sakadāgāmī sakadāgāmiphalāti? Āmantā. Arahato rāgo pahīno …pe… anottappaṁ pahīnaṁ, na parihāyati arahā arahattāti? Na hevaṁ vattabbe. Sakadāgāmissa vicikicchā pahīnā …pe… oḷāriko byāpādo pahīno, na parihāyati sakadāgāmī sakadāgāmiphalāti? Āmantā. Arahato rāgo pahīno …pe… anottappaṁ pahīnaṁ, na parihāyati arahā arahattāti? Na hevaṁ vattabbe.