Na vattabbaṁ— “ñāṇaṁ anārammaṇan”ti? Āmantā. Arahā cakkhuviññāṇasamaṅgī ñāṇīti vattabboti? Āmantā. Atthi tassa ñāṇassa ārammaṇanti? Na hevaṁ vattabbe …pe… tena hi ñāṇaṁ anārammaṇanti. Arahā cakkhuviññāṇasamaṅgī paññavāti vattabboti? Āmantā. Atthi tāya paññāya ārammaṇanti? Na hevaṁ vattabbe …pe…. Tena hi paññā anārammaṇāti. Ñāṇaṁ anārammaṇantikathā niṭṭhitā. Mahāpaṇṇāsaka Navamavagga Atītānāgatārammaṇakathā Atītārammaṇaṁ cittaṁ anārammaṇanti? Āmantā. Nanu atītārammaṇanti? Āmantā. Hañci atītārammaṇaṁ, no ca vata re vattabbe— “atītārammaṇaṁ cittaṁ anārammaṇan”ti. Atītārammaṇaṁ cittaṁ anārammaṇanti micchā. Hañci vā pana anārammaṇaṁ, no ca vata re vattabbe— “atītārammaṇan”ti. Anārammaṇaṁ atītārammaṇanti micchā. Atītārammaṇaṁ cittaṁ anārammaṇanti? Āmantā. Nanu atītaṁ ārabbha atthi āvaṭṭanā …pe… paṇidhīti? Āmantā. Hañci atītaṁ ārabbha atthi āvaṭṭanā …pe… paṇidhi, no ca vata re vattabbe— “atītārammaṇaṁ cittaṁ anārammaṇan”ti.