No ce pana vattabbe— “atthi devesu asaṁvaro, yamhā asaṁvarā saṁvaro sīlan”ti, no ca vata re vattabbe— “asaṁvarā saṁvaro sīlaṁ, atthi devesu saṁvaro”ti. Yaṁ tattha vadesi— “vattabbe kho ‘asaṁvarā saṁvaro sīlaṁ, atthi devesu saṁvaro’, no ca vattabbe— ‘atthi devesu asaṁvaro, yamhā asaṁvarā saṁvaro sīlan’”ti micchā. Atthi manussesu saṁvaro, atthi tattha asaṁvaroti? Āmantā. Atthi devesu saṁvaro, atthi tattha asaṁvaroti? Na hevaṁ vattabbe …pe…. Atthi devesu saṁvaro, natthi tattha asaṁvaroti? Āmantā. Atthi manussesu saṁvaro, natthi tattha asaṁvaroti? Na hevaṁ vattabbe …pe…. Atthi devesu pāṇātipātā veramaṇīti? Āmantā. Atthi devesu pāṇātipātoti? Na hevaṁ vattabbe …pe…. Atthi devesu surāmerayamajjapamādaṭṭhānā veramaṇīti? Āmantā. Atthi devesu surāmerayamajjapamādaṭṭhānanti? Na hevaṁ vattabbe …pe…. Natthi devesu pāṇātipātoti? Āmantā. Natthi devesu pāṇātipātā veramaṇīti? Na hevaṁ vattabbe …pe…. Natthi devesu surāmerayamajjapamādaṭṭhānanti? Āmantā. Natthi devesu surāmerayamajjapamādaṭṭhānā veramaṇīti? Na hevaṁ vattabbe …pe….