Maggasamaṅgī lokiyena ca lokuttarena ca sammākammantena …pe… sammāājīvena samannāgatoti? Āmantā. Maggasamaṅgī lokiyāya ca lokuttarāya ca sammādiṭṭhiyā samannāgatoti? Na hevaṁ vattabbe …pe… maggasamaṅgī lokiyena ca lokuttarena ca sammāājīvena samannāgatoti? Āmantā. Maggasamaṅgī lokiyena ca lokuttarena ca sammāsaṅkappena …pe… lokiyena ca lokuttarena ca sammāsamādhinā samannāgatoti? Na hevaṁ vattabbe …pe…. Na vattabbaṁ— “maggasamaṅgī dvīhi sīlehi samannāgato”ti? Āmantā. Lokiye sīle niruddhe maggo uppajjatīti? Āmantā. Dussīlo khaṇḍasīlo chinnasīlo maggaṁ bhāvetīti? Na hevaṁ vattabbe …pe… tena hi maggasamaṅgī dvīhi sīlehi samannāgatoti. Dvīhisīlehikathā niṭṭhitā. Mahāpaṇṇāsaka Dasamavagga Sīlaṁacetasikantikathā Sīlaṁ acetasikanti? Āmantā. Rūpaṁ …pe… nibbānaṁ … Cakkhāyatanaṁ …pe… kāyāyatanaṁ … rūpāyatanaṁ …pe… phoṭṭhabbāyatananti? Na hevaṁ vattabbe …pe… sīlaṁ acetasikanti? Āmantā. Phasso acetasikoti? Na hevaṁ vattabbe …pe… sīlaṁ acetasikanti? Āmantā. Vedanā …pe… saññā …pe… cetanā …pe… saddhā …pe… vīriyaṁ …pe… sati …pe… samādhi …pe… paññā acetasikāti? Na hevaṁ vattabbe …pe….