Na vattabbaṁ— “kiñci saṁyojanaṁ appahāya arahattappattī”ti? Āmantā. Arahā sabbaṁ buddhavisayaṁ jānātīti? Na hevaṁ vattabbe. Tena hi atthi kiñci saṁyojanaṁ appahāya arahattappattīti. Saṁyojanakathā niṭṭhitā. Mahāpaṇṇāsaka Ekavīsatimavagga Iddhikathā Atthi adhippāyaiddhi buddhānaṁ vā sāvakānaṁ vāti? Āmantā. “Niccapaṇṇā rukkhā hontū”ti— atthi adhippāyaiddhi buddhānaṁ vā sāvakānaṁ vāti? Na hevaṁ vattabbe …pe… “niccapupphā rukkhā hontu …pe… niccaphalikā rukkhā hontu … niccaṁ juṇhaṁ hotu … niccaṁ khemaṁ hotu … niccaṁ subhikkhaṁ hotu … niccaṁ suvatthi hotū”ti— atthi adhippāyaiddhi buddhānaṁ vā sāvakānaṁ vāti? Na hevaṁ vattabbe …pe…. Atthi adhippāyaiddhi buddhānaṁ vā sāvakānaṁ vāti? Āmantā. “Uppanno phasso mā nirujjhī”ti— atthi adhippāyaiddhi buddhānaṁ vā sāvakānaṁ vāti? Na hevaṁ vattabbe …pe…. “Uppannā vedanā …pe… saññā … cetanā … cittaṁ … saddhā … vīriyaṁ … sati … samādhi …pe… paññā mā nirujjhī”ti— atthi adhippāyaiddhi buddhānaṁ vā sāvakānaṁ vāti? Na hevaṁ vattabbe …pe….